又一個80年代歌手舉行25週年紀念演唱會,今下次嘅主角就係玉女長門人周慧敏啦. (回想當年我都有儲埋一大堆慧敏嘅閃卡呢, 哈哈......)演唱會嘅opening未有強烈震撼嘅感覺, 之後一個接一個嘉賓出現去頌讚Vivian....實在太悶場,如細迷所講演唱會開始已大半小時, 只係唱過約五首自己嘅歌,未免有啲過份, 但該部份完結後竟然有一啲驚喜出現.....
入場前絕冇太大期望 Vivian 會有任何勁歌熱舞, 但當第二部份強勁節奏一起驚喜就出現啦, 點解啲節奏咁熟, 嘩! 原來玉女要變壞女孩啦,一句 Why Why Tell Me Why... 出奇地 Vivian 唱出另一種風格,多咗幾分女性美 絕冇格格不入嘅感覺, 值得一讚. 之後緊接嘅有跳舞街, 對你愛不完等亦出奇地好聽, 最後再唱出經典金曲'自作多情'作完結,好有80年代感覺, 我好享受,不過較年輕嘅歌迷可能未必投入到.
開心一陣後Vivian開始唱出自己嘅金曲, 好聽但總係投入唔到, 但一到嘉賓 Sammi 出埸後, 全晚高潮就出演. 合唱一曲後真係高下立見, Vivian 控制氣氛嘅能力遠比 Sammi 遜色, Sammi 更有喧賓奪主之勢. 相信如冇意外繼梅姐之後, Sammi 肯定係一位能自己壓台嘅明星.
最後一位嘉賓Sammi走後我彷彿成個人清醒咗一樣, 睇演唱會嘅心情氣氛全部返哂哩. Vivian 再唱出自己一堆金曲如 '如果你知我苦衷' 等等... 忽然古巨基又走出場話要介紹一位超重量級嘉賓出場, 嘩! 原來係細迷等咗成晚, 我又好期待嘅日本歌手柏原芳惠小姐. 佢自己唱出'最愛'一曲, 雖然我唔識日文, 而且今次亦係我咁大個仔以來0係紅館第一次睇日本歌手嘅現場表演, 所以我睇到幾感動.
最後安歌咗二次, 全場人才正式離開. 雖然開段悶場較多, 但一首'壞女孩', 再加上 Sammi 嘅出現, 再有柏原芳惠嘅靚歌靚聲, 再加上尾段 Vivian 唱出嘅經典金曲, 整體都算合格, 但冇太大驚喜, 唔知哩緊張會係邊位80年代嘅歌手再有 XX 週年演唱會呢?
大迷上
24-03-2011
沒有留言:
張貼留言